Bericht des Volleyballturniers vom 02.04.2012

So war es ...

Prěni volleyballowy turněr z mjenom “Witamy nalěćo”

Mustwa z kwětkowymi symješkami mytowali

Serbska šula Ralbicy je wčera wječor zhromadnje z mustwom abiturneho lětnika 1996 prěni volleyballowy turněr z mjenom “Witamy nalěćo” přewjedła. Wosom cyłkow so na hrajnišćomaj w Ralbičanskej sportowni wubědźowaše. Nimo wučerskich zastupnistwow z Ralbic, Kulowa, Budyšina a Worklec běchu to hišće Mustwo 1296, Chór Meja, SJ Chrósćicy a Sokoł Ralbicy/Hórki. W předkole přeswědčištej w stafli B Serbski gymnazij Budyšin a Sokoł Ralbicy/Hórki – mustwje, kotrejž so pozdźišo w finalu znowa zetkaštej. W předkole móžeše Sokoł wobě sadźbje dobyć, w kónčnej hrě pak bě Budyšin z 25:23 wo dypkaj lěpši. Stafla A bě wurunaniša. Worklecy so přesadźichu a na městnomaj dwaj a tři dyrbjachu małe dypki rozsudźić. Chór Meja měješe lěpši dypkowy poměr přirunajo ze SJ Chrósćicy. Překřižnej duelej dobyštaj dominatoraj ze stafle B. Worklecy a Radwor so tak hišće raz zetkaštaj a hraještaj wo třeće městno, štož bě potom jasna naležnosć za “Hórniki”. Dalše zaměstnjenja namakaće w přehledźe. Při mytowanju dósta kóžde mustwo titku z kwětkowymi symješkami, kotrež dyrbja so w aprylu wusyć, zo bychu w lěću a nazymje kćěli. To budźe zawěsće rjana dopomnjenka, hdyž budu w Kulowje asterki kćěć a w Budyšinje słónčne róže.

kónčny staw

1. Serbski gymnazij Budyšin
2. Sokoł Ralbicy/Hórki
3. Serbska šula “Michał Hórnik” Worklecy
4. Chór Meja
5. Srjedźna šula Kulow
6. SJ Chrósćicy
7. Mustwo 1296
8. Serbska šula Ralbicy

Před zahajenjom turněra “Witamy nalěćo” dyrbješe so modus rozkłasć a k tomu tež hišće wotpowědne prawidła. Zady na ławce sedźi mustwo z Kulowa, prědku hrajerki a hrajerjo SJ Chrósćicy a Sokoła Ralbicy/Hórki.

Jan Hrjehor